शहीद प्रदीप मांदळे यांच्या कुटुंबियांना १ कोटीची मदत!
बुलडाणा (बुलडाणा लाइव्ह वृत्तसेवा) ः जिल्ह्यातील शहीद जवान प्रदीप साहेबराव मांदळे (युनिट 10 महार रेजिमेंट, रा. पळसखेड चक्का, पो. सावखेड तेजन ता. सिंदखेड राजा) हे देशातंर्गत सुरक्षा संबंधी ऑपरेशन रक्षक मोहिमे अंतर्गत नियंत्रण रेषेजवळ द्रास सेक्टर येथील ऑपरेशन एरियामध्ये हिमस्खलनाच्या नैसर्गिक आपत्तीमुळे 15 डिसेंबर 2020 रोजी शहीद झाले. या शहीद जवानच्या कुटूंबियांना राज्य शासनातर्फे 1 कोटी रुपयांची आर्थिक मदत जाहीर झाली. या मदतीचा धनादेश आज, 31 मार्चला राज्याचे अन्न व औषध प्रशासन मंत्री तथा पालकमंत्री डॉ राजेंद्र शिंगणे यांच्याहस्ते जिल्हाधिकारी कार्यालयात शहीद जवानाच्या कुटूंबियांना प्रदान करण्यात आला. यावेळी जिल्हाधिकारी एस. रामामूर्ती, जिल्हा पोलीस अधिक्षक अरविंद चावरिया, सहायक जिल्हा सैनिक कल्याण अधिकारी भास्कर पडघान, श्री. सोनटक्के आदी उपस्थित होते. शहीद जवान प्रदीप मांदळे यांच्या कुटूंबीयांमध्ये 60 लक्ष रुपयांचा धनादेश वीरपत्नी श्रीमती कांचन प्रदीप मांदळे, वीरमाता श्रीमती सुनंदा साहेबराव मांदळे यांना 40 लक्ष रुपयांचा धनादेश देण्यात आला.